കഥയും തിരക്കഥയും പാട്ടും പഠനവും നാടകവും നോവലുമായി, പലതായി പിരിയുന്ന എഴുത്തുലോകമാണ് ജമാൽ കൊച്ചങ്ങാടിയുടേത്. വക്കാലത്തെടുക്കാൻ വക്താക്കളധികമില്ലാത്തവരുടെ വേദനകൾ അദ്ദേഹം ആവർ ത്തിച്ച് ആവിഷ്കരിക്കും. വിഷയത്തിന്റെ ഓരോ ഇഴയും അഴിച്ചെടുത്ത് കൗതുകജനകമായ സൂക്ഷ്മതയോടെ പരിശോധിക്കും. സാഹിത്യകൃതികളിലെ ഉചിതമായ ഉദ്ധരണികൾകൊണ്ട് പ്രശ്നത്തിന്റെ ആഴം വ്യക്തമാക്കും. വൈകാരിക തീവ്രത പകരാൻ പാട്ടുശകലങ്ങളും ചേർക്കും. വായനക്കാരനെ വലിച്ചടുപ്പിക്കുന്ന ഭാഷയിൽ പറയാനുള്ളത് വളച്ചുകെട്ടില്ലാതെ പറയും. അത്തരം ചില കുറിപ്പുകളുടെ സമാഹാരമാണ് ഈ കൃതി.