ആഗോള ഫുട്ബോൾ ആവേശത്തിന്റെ പശ്ചാത്തലത്തിൽ, കളിയുടേയും എഴുത്തിന്റേയും വേറിട്ട കഥകളുമായി ബുക്ക് ഈവ് (Book Eve) സംഘടിപ്പിച്ച ‘കളിക്കാര്യം’ ടോക്ക് ഷോ ശ്രദ്ധേയമായി. ചെമ്മാട് ബുക്പ്ലസ് പാർട്ടി ഹാളിൽ വെച്ച് നടന്ന പരിപാടിയിൽ പ്രമുഖ കായിക എഴുത്തുകാരും സാംസ്കാരിക പ്രവർത്തകരും പങ്കെടുത്തു.

​ഫുട്ബോൾ സാഹിത്യത്തിലെ ശ്രദ്ധേയമായ രണ്ട് കൃതികളെ മുൻനിർത്തിയായിരുന്നു ചർച്ച. പ്രമുഖ എഴുത്തുകാരായ മുഖ്താർ ഉദരംപൊയിൽ (രചയിതാവ് – ‘ഉസ്താദ് എംബാപ്പെ’), സലാഹുദ്ദീൻ അയ്യൂബി (രചയിതാവ് – ‘സോക്കർ ദർവീശ്’) എന്നിവർ തങ്ങളുടെ പുസ്തകങ്ങളെയും ഫുട്ബോൾ അനുഭവങ്ങളെയും മുൻനിർത്തി വായനക്കാരുമായി സംവദിച്ചു.
​കേവലം ഒരു കായിക വിനോദമെന്നതിനപ്പുറം ഫുട്ബോൾ എങ്ങനെയാണ് മനുഷ്യജീവിതത്തെയും സംസ്കാരത്തെയും സ്വാധീനിക്കുന്നത് എന്ന് വ്യക്തമാക്കുന്നതായിരുന്നു ഇരുവരുടെയും സംസാരം. ലോകകപ്പിന്റെ ആവേശത്തിനൊപ്പം ഫുട്ബോളിന്റെ ചരിത്രവും കഥകളും പങ്കുവെച്ച സെഷൻ കായികപ്രേമികൾക്കും വായനക്കാർക്കും ഒരുപോലെ വേറിട്ടൊരു അനുഭവമായി മാറി.